Bu gün Binəqədi rayon Məhkəməsində Penitensiar Xidmətin Cəzaçəkmə Müəssisəsindən qaçmaqda təqsirləndirilən milliyyətcə erməni Edqar Sarkisyana hökm oxunub. ANS PRESS-in məlumatına görə, bacısını zorlamaqda və döyməkdə ittiham olunaraq Ağır Cinayətlərə Dair İşlər üzrə Məhkəmənin hökmü ilə 14 il azadlıqdan məhrum edilən E. Sarkisyan 2008-ci il noyabrın 8-də gecə saat 04.00 radələrində cəza çəkdiyi 11 saylı Cəzaçəkmə Müəssisəsindən qaçıb. Həmin vaxt ərazidə xidmət aparan mühafizə alayının əsgərlərinin əmrinə tabe olmayan məhkuma atəş açılıb. Nəticədə o, ayağından güllə yarası alıb. E. Sarkisyan saxlanılarkən mühafizəçi əsgər Şəhriyar Hüseynova xəsarət yetirib. Məhkəmədə ifadə verən E. Sarkisyan həbsxanadan qaçmaq addımını Ağır Cinayətlərə Dair İşlər üzrə Məhkəmənin hökmünə etiraz olaraq atdığını və imkan düşəcəyi halda bundan sonra da qaçacağını deyib. Hakim Natiq Abbasovun sədrlik etdiyi məhkəmənin hökmü ilə E. Sarkisyan Azərbaycan Cinayət Məcəlləsinin 304.1-ci (həbsdən və ya mühafizə altından qaçma) və 315-ci (hakimiyyət nümayəndəsinə qarşı müqavimət göstərmə və ya zor tətbiq etmə) maddələri ilə təqsirləndirilərək 2 il 6 ay müddətinə azadlıqdan məhrum edilib. Məhkəmə CM-nin 67.1-ci (hökmlərin məcmuyu üzrə cəzanın təyin edilməsi) maddəsini tətbiq etməklə əvəlki hökmdən qalmış cəzasının çəkilməmiş hissəsi ilə qismən toplanaraq 15 il azadlıqdan məhrumetmə cəzası təyin edib.