Ermənistanın xüsusi xidmət orqanları Azərbaycan Ordusunu, Azərbaycan əsgərini ləkələmək üçün növbəti iyrənc vasitəyə əl atıb. Erməni təbliğatı öz mənfur niyyətini həyata keçirmək üçün bu dəfə gənc iqtisadçı Vüsal Həsənovdan vasitə kimi istifadə etməyə çalışıb. Bu ölkənin kütləvi informasiya vasitələri onun adından guya hərbi hissədə təzyiq və işgəncələr məruz qaldığını əsas gətirərək Vətənindən üz çevirməsi, guya Ermənistan tərfə keçmək istəməsi ilə bağlı Ermənistan hökumətinə müraciət ünvanlayıb. Məsələyə aydınlıq gətirmək üçün erməni təbliğatının mənfi qəhrəmanı ilə görüşdük. Heç nədən xəbəri olmayan Vüsal eşitdiklərindən şoka düşdüyünü deyir: «Mən o mətni oxuyanda dəhşətə gəldim. Necə ola bilər ki mən elə bir şey yaza bilərəm. Belə şey yatsam yuxuma da girməz.
Ermənilərə qarşı içində nifrətdən başqa bir şeyin olmadığını deyən Vüsal Həsənov Ermənistan hökumətinə müraciət etməyin absurd olduğunu deyir. Hərbi xidmətini 7 ay əvvəl başa vuran Vüsal onun adından yazılmış məktubun təxribat olduğun bildirir. Daxili Qoşunlarda xidmət etdiyini deyən keçmiş əsgər xidməti dövründə hər hansı təzyiq və ya işgəncəyə məruz qalmadığını deyir: «Mən fəxr hissi ilə deyirəm ki, Azərbaycan Ordusunda xidmət etmişəm. Komandirlərimiz əsgərlərlə qohum övladı kimi münasibət göstəriblər». Saxta məlumatın internetdə yaılmasının mənbəyinə gəldikdə isə Vüsal yeganə mənbə kimi özü haqda məlumatları və fotoşəkilləri yerləşdirdiyi odnoklassniki.ru saytını düşünür: «Anamgil andiçmə mərasiminə gəlmişdilər. Onlarla şqəkillər çəkdimişdi və həmin şəkilləri telefondan kompüterimə yüklədim. Ondan sonra odnoklasniki.ru satında qeydiyyatdan keçdim. Həm mülki, həm də andiçmə mərasimindəki şəkillərimi ora yerləşdirdim».
Məsələyə Respublika Hərbi Prokurorluğu da münasibətini açıqlayıb. Prokurorluqdan ANS-ə bildirilib ki, Ermənistanda nəşr olunan “Versiya” qəzetində (versiya.am) Azərbaycan Daxili Qoşunlarının keçmiş əsgəri V. Həsənov barəsində yayılan informasiya ilə əlaqədar araşdırma aparılıb, o, Respublika Hərbi Prokurorluğa dəvət olunaraq izahatı alınıb. V. Həsənov Hərbi Prokurorluğa verdiyi izahatında bu məlumatların yalan olduğunu bildirib. O, Azərbaycan Daxili Qoşunlarında xidmət etdiyini və 2008-ci ilin iyulunda ordudan təxris olunduğunu qeyd edib. Hərbi qulluq keçdiyi dövrdə xidmət yerində heç bir problemlə qarşılaşmadığını vurğulayan V. Həsənov onun və Azərbaycan Ordusu haqqında yazılanların həqiqətə uyğun olmadığını söyləyib. Hərbi Prokurorluqdan, həmçinin V. Həsənovun hərbi qulluq keçdiyi illərdə nizam-intizamı ilə seçilən əsgər olduğu bildirilib.

Qeyd edək ki, Ermənistanda nəşr olunan “Versiya” qəzetinin (versiya.am) yazdığına görə, guya Azərbaycan Ordusunun əsgəri, Sumqayıt şəhər Hərbi Komissarlığından hərbi xidmətə çağırılmış 23 yaşlı Vüsal Həsənov hərbi hissədə təzyiqlərlə üzləşdiyini əsas gətirərək, Ermənistan rəhbərliyinə müraciət edib, onlardan kömək istəyib.